«Հաշտարարության մասին» ՀՀ օրենքում, ՀՀ Աշխատանքային օրենսգրքում և ՀՀ Քաղաքացիական օրենսգրքում փոփոխությունների նախագծերով առաջարկվում է որոշակի աշխատանքային վեճերի դեպքում մինչև դատարան դիմելը ներդնել պարտադիր հաշտարարության ընթացակարգ։
Նախագծերի ընդունման դեպքում դատական պաշտպանության դիմելուց առաջ հաշտարարությունը պարտադիր կդառնա հետևյալ վեճերի համար՝
• աշխատանքային պայմանագրի փոփոխման կամ լուծման վերաբերյալ վեճեր,
• աշխատողների նկատմամբ կարգապահական տույժերի կիրառման վերաբերյալ վեճեր,
• կոլեկտիվ աշխատանքային վեճեր։
Պարտադիր հաշտարարության կիրառման դեպքում կողմերը նախ պետք է դիմեն հաշտարարի՝ փորձելով վեճը կարգավորել արտադատական կարգով, և միայն հաշտարարության գործընթացի ավարտից հետո կարող են դիմել դատարան։
ՀՀ քաղաքացիական օրենսգրքում առաջարկվող փոփոխությունները հստակեցնում են, որ հայցային վաղեմության ժամկետները կկասեցվեն հաշտարարության իրականացման ամբողջ ժամանակահատվածի ընթացքում՝ կողմերի միջև կնքված հաշտարարության մասին համաձայնության հիման վրա իրականացվող, և օրենքով նախատեսված պարտադիր հաշտարարության դեպքերում։
Վերը նշված փոփոխությունները ներկայումս դեռ նախագծեր են և կիրառելի կդառնան միայն ընդունվելու և ուժի մեջ մտնելու դեպքում։
Առաջարկվող բարեփոխումները նպատակ ունեն զարգացնելու վեճերի լուծման այլընտրանքային մեխանիզմները Հայաստանում, խթանելու գործատուների և աշխատողների միջև արդյունավետ երկխոսությունը և ապահովելու աշխատանքային վեճերի առավել արագ ու արդյունավետ կարգավորում։